Atyu nang Azazarak nTswa nyia tyok tazwa gu ani a ni shim a ghwan Yesu A nyia tyok tazwa gu nchiring.  Anyawa m-byia a ni ya ason a bu kwan a tyia atyin mami Yesu, a ni tak mang anyiet nang gu byia afing nang Azazarak nTswa wu tyei mami swat ngu-ka ani.

“Mman-tswa na nang zi shya da’vwuo Azazarak nTswa ani, kikya yet fak da’ghyang, mang asai alyia, mang swat nyinyang, mang nyeap nfwuo, mang nyian aghyang atan, mang nyian aghyang atsatsak, mang nyian atsotswat, mang khui aghyang shyonshyon, mang nyep apyia” (Agal 5:22).

Jen nang atyu wuni n-shim a si ghwan Azazarak nTswa si nwuo nyia tyok mi’fwuo ngu-hu ani, a na shya mang didang nyian nkyang nang Agwaza na n-fak nyinyang ani.  A na fwuong didang fang Azazarak Alyiat Agwaza na, a bu naai, a bu shai mang aghyang anyiet sisak ji nang ba na n-nwuak fwuo da’Yesu A kpaat ameang mang amba ani.  Awot a bu chat a mun apyia mang akum anyiet-khui ka.

Awot ka atyu-khui shim a si ghwan Azazarak nTswa si nyia tyok mi’fwuo ngu ba! a na li nang tankai aiyu a khui nkyang atachya, awot a si byia A zazarak n Tswa wu ani ba!.

3.      Atyu-khui a tai atyu a khui nkyang atachya ani
“Ananyiuk, n si min dyiat mang anyin di sisak ji nang ku n-myim n dyiat mang asi-ba byia Azazarak nTswa ani ba!, n dyiat mang anyin nang anyiet-khui nkyang atachya bya ani!  Abaan nya nang n kau nyin, akpau kyang-yak wa ba!, danyan nyi kan maai ya akpau kyang-yak wu ba!  Nyin manini ka, nyi kan maai ba!.  Nyi ni yet anyiet-khui nkyang atachya.  Mat nang nyi byia swam nyi ni yong mi din zook, ku tak nang nyi ni n-gyet asi-khui atachya bya mang asi-nwai khui bya ba! a?”  (1 Akor 3:1-3)

Ghwughwu huni tak zit nyia atyu wuni kan nwuak twuo da’Yesu, awot amgbam mang anya a shim a bu ghwan Yesu A nyia gu ajhyem tyok ba!.  Tankai ayin huni nyia tyok tazwa nkyang ngu-na ma’pyia gu.  Awot a byia mun apyia mang Azazarak nTswa wu shansham ba!.

	Atyu nang Azazarak nTswa wu nyia tyok da’nggu ani, ka a bu bwuak a si tabat khui fwuong nyinyang apyia gu alan khui kyang nang Agwaza n-fak nyinyang ani (1 Yoh 2:15-16), ko nang gu chat swan swat khui hu di tyia alyia ngu-hu manyin hu, tankai ayin ahwa na tai atyu a khui nkyang atachya dakonu Yesu ani.

A ni kwan, da’nggu a hyiak da’Gwaza ba!.  Anyawa gu ni n-dam ku bu hat gu di sisak ji nang gu ni n-kwa di khui Yesu ani.  Tankai ayin huni n-kai kyang nang gu nyia ani ba!

Tankai ayin huni, a si min gya ason mami swat khui Yesu ngu-hu ba!.  Fak hu nang gu n-fak da’Ggwaza mang aghyang anyiet ani, ku ghyuai mi’fwuo ngu-hu.  Didang naai Agwaza hu mang fang Alyiat Agwaza na ghyuai mi’fwuo ngu-hu.  A byia gbang alyia ba!, a yong ma di fwuong a n-gei a byia abun, a ni yong mi di fwong byian fwuo.

Ghwughwu na na shya da’manta ka ntung ani, tak sisak ji nang atyu-khui ni n-bwuok a tyia tankai ayin huni ani.  Atyu khui nkyang atachya, ka doot a si nwuak fwuo da’Yesu a si kpaat ameang mang anggu, jen ajaja nang Azazarak nTswa wu na n-nwuo mang anggu..  Kuzang kyang na swan kankarang mang anggu jen si ba nyia nang abwobwon kyang awa bu ba n-doot ani.  To, ka a khui

Yesu mang kwan apyia gu hwa a si lak hyiak da’nggu hu ani, jen ajaja nang gu na n-nwai ya ason di khui Yesu hu.  Ka kuzang kyang naat shansham a na gwai, awot ka ku byian a na teap di khui Yesu hu ma’dyudyung alyia.  Nagaan wu a bu ni kwan a khui Yesu shansham ba!, a ni ya ason kya mang khui atachya ka.

Mami ghwughwu ntat nani, zang huhwa tak tankai swat nang a n-shya maninika ani?  Zang huhwa nang a chat a li nang anhu ani?

1.  Nwuan apyia ang a li, ka a na fik ke a swan tankai nswat nang atyu a tai atyu byia Azazarak nTswa wu ani swan ani.  

2.  Byia didang chat Azazarak nTswa wu na nyia tyok da’nwan ani.  (Yoh 7:37-39;Matt 5:6)

3.  Shim a si tyiai Agwaza amgbam ayakatuk adidam mang akatuk nyia nang a lyen a nyia ani (1 Yoh 1:9)

4.  Bu nwuak apyia ang amgbam da’vwuo Agwaza gu ki nyia ajhyem tyok da’nwan.  (Arom 12:1,2)

5.  Nwuak fwuo di naai Agwaza Tswa Ji na n-swan dundung mang anwan mami fwuo ang-hu ma’tyentyang.  Manang zi n-nwuak fwuo da’Yesu zi si san gu ani, ma anyawa zi na n-shya Azazarak nTswa wu di nwuak fwuo mameang.  Agwaza kam zit nyia zi ghwan Tswa ngu-ji Ji nyia tyok mang anzit(Af 5:18).  Agwaza lap anu nyia ka zi naai gu di sisak nang Gu n-dap asak ani, A bu na shim zit ndyo (1 Yohanna 5:14,15)

A fik a si bu lyen nang a nyia tyok tazwa apyia ang a? A chat Azazarak nTswa nyian tyok apyia ang amgbam a? Ka anyawa, maninika ya n-shim a si tyiai amgbam ayakatuk adidam mang ayakatuk nyia nang Azazarak nTswa jhyung ang ani.  Maninika, naai a si nwuak fwuo da’Gwaza nang Gu na n-tyia Azazarak nTswa Ngu-wu A nyia tyok tazwa ang ani.  Di tankai naai ghyang hwahu:  Agwaza, n fak ada’nwan.  N nyia akatuk di nyia tyok tazwa apyia nung.  Jip nung dyo.  N gwai.  N chat a bu nyia ajhyem tyok tazwa nung.  Tyia Azazarak nTswa Ang-wu gu nyia nung ajhyem tyok nang A n-kam ani.  A lap anu mami Alyiat ang-ka nyia ka n dyip ang di nwuak fwuo a na shim nung ndyo.  N gwai nang A n-tyia Tswa ang-ji nyia tyok tazwa nung ani.  Ku swan anya! Naai huni tangam fwuo ang-hu a?  Da naai la!

A kan dyip Agwaza Gu tyia Azazarak nTswa wu nyia tyok tazwa ang a?  A lyen nang Azazarak nTswa wu nyia tyok tazwa ang maninika a?  A nyia ni a si n-dyen?  Agwaza lap anu nyia ka zi naai Gu nang Gu n-dap asak ani, A na fak A bu shim zit dyo (1 Yoh 5:14-15).  Danyan lap anu akyakya nang a n-dyen nang Gu shim ang dyo, A si tyia Azazarak nTswa si nyia tyok da’nwan.  Amgbam mang sang-gak nang a n-fak ani, yok but mi’fwuo ba!.  Gwai Agwaza nang Gu ni n-tyei Azazarak nTswa ngu-wu si nyian tyok da’nwan di sisak ji nang a ni n-nwuak achuchuk da’kyang Gu n-dap anu ka ani.

Ku yet ta hwa a myiam di sisak ji nang a na n-chong dundung mang Azazarak nTswa wu ani.  Yong ma di nwuak fwuo da’Gwaza kuzang jen.  Mang anya, ka a nyia akatuk a si bu tabat nyian tyok apyia ang, ku myim a myiam sisak ji nang a na n-“swuan” ani…

Swuan huhwa yet, a tin abyabyia gwun ghwit ndyo nta, a bu khuat achuchuk gwun nwuo ndyo mami.  

1.  A ni tin abyabyia ngwun ghwit dyo—Huhwa yet a shim a bu tyiai akatuk adidam mang akatuk nyia ang-wu, a bu shim kyang nang Agwaza hyia tazwa na ani.  A bu shyak achyet.

2.  A ni khuat achuchuk ngwun wu nwuo dyo—Huhwa yet a nwuak Yesu tyok tazwa swat ang-hu, a bu nwuak fwuo a ghwan Azazarak nTswa wu gu nyian tyok da’nwan.  Jen ji a n-fik ahkatuk mami fwuo ang-ka ani, ku myim a jhyung sisak ji nang a n-swan tankai swan huni shansham ani.  Ka a yong ma di nyia anya a na ya ason mi khui Yesu hu nchiring.

Bwai nkhang abatakada kani mang aghyang anyiet!!

Kofin wannan dan littafi, ko0 juya shi zuwa wani harshe, dudkansa ko wani sashi nasa, to, haram ne muddin ba a sami iznin Greaat Commission Movement ba.  Adireshinmu:  Great Commission Movement, Box 500, Jos, Nigeria.